Subsidio pa expancion di estudio pa dokter di cas na Aruba
E Organisacion Laboral Temporal Hulanda a duna Aruba un subsidio di 3 miyon florin pa expande e estudio local pa dokter di cas na Aruba. Meta ta pa na fin di 2030, 10 dokter forma localmente termina nan estudio. Ehecutando e plan aki, Aruba lo conta cu un total di 60 dokter di cas. Cu e subsidio aki, lo por amplia capacidad di formacion cu un cuarto parti pa september 2023 te cu 2030.
Motibo di e proyecto ta e escasez di dokter di cas na Aruba. Estudio ta mustra cu entre 2021 y 2030 mas of menos 15 dokter di cas lo retira of para nan practica. Ademas, tin dokter cu kier traha mas part time. Banda di e escasez creciente di dokter di cas, tin un demanda grandi pa cuido di dos linea y asistencia medico urgente. Esaki ta bay man den man cu gasto halto y wardamento largo innecesario cerca specialista.
E expansion ta nifica cu tambe dokter basico registra den AruBIG, kende mas tanto ta yiu di tera, por aplica pa e estudio. E grupo nobo di dokter di cas lo por papia Papiamento (of siña e idioma) y desaroya un mihor afinidad cu e aspecto social-cultural di Aruba. Danki na esaki, pashent por ricibi mihor trato riba prome linea pa asina por alivia di dos linea. Mas dokter disponibel tambe ta nifica cu un pashent lo tin un dokter fiho, menos verwijzing pa di dos linea y hospital por concentra riba super specialidad.
Pa garantisa calidad di e estudio, ta coopera estrechamente cu Vrije Universiteit na Amsterdam. E estudio pa dokter di cas di VU ta supervisa calidad di e curso y ta responsabel pa guia e docentenan. E dokternan cu completa e estudio lo haña registracion tanto di AruBIG como di BIG Hulandes.
Den e proyecto aki ta coopera tambe cu stakeholder Huisartsenvereniging Aruba (HAVA) y, mas riba distancia, Ministerio di Turismo y Salubridad Publico y Ministerio di Enseñansa.