Energia ta di vital importancia pa Aruba debi na su gran influencia den Economia, y energia tambe ta desempeña un papel importante den casi tur actividad social. Como consecuencia, gasto di energia ta un fuerte determinante di desaroyo macro- y socioeconomico di e isla. Dependencia di combustibel fosil ta expone Aruba na fluctuacion den prijs di petroleo y genera incertidumbre respecto costo di bida y crecemento economico. Ademas, pago di importacion di combustibel fosil tin un impacto negativo riba balansa di pago y reserva di divisa.
Na lus di esaki, Aruba ainda no ta dispone di un marco legal pa regulacion suministro di energia y awa. Aunke regulacion den sector di servicio publico ta habitual den mayoria pais desaroya (manera Europa, Estados Unidos, Latino America) y tambe riba hopi isla di Caribe, ainda no a desaroya esaki na Aruba. Pa e motibo ey, a identifica necesidad di modernisa legislacion energetico den varios plan nacional y documento politico (incluso e actual Regeerakkoord), estudio internacional y durante consulta del FMI.
Aunke regulacion di sector di servicio publico por abarca un scala amplio di area di gobernacion y supervision, un aspecto importante ta formacion of regulacion di prijs. Regulacion di prijs ta comun den mercado monopolico unda un entidad regula no por fiha prijs su so, pa evita abuzo di poder di mercado y garantisa proteccion di consumidor.